愛心甜品屋不敵瘋狂加租
瀕執笠 良心老闆:難捱
【本報訊】回頭浪子金不換,年少時以啪丸及飆車度日的吳玉新,在時速 220公里下掟彎炒車,幸好在鬼門關前過門而不入,從此改過自新,在北區開設彩虹甜品屋,沙士期間到醫院送糖水,為醫護人員打氣,又聘請長期病患者及雙失青年,抱着「用糖水滋潤身體,用福音滋潤心靈」宗旨做人,可惜良心老闆卻敵不過業主瘋狂加租,「今年係呢十年來最難捱嘅一年!」
記者:袁慧妍
吳玉新 33歲,人生大部份時間也活在陰霾中。他自言是「鄉下仔」,父母在新界耕田, 8歲時母親肝硬化離世,他下田幫手種菜。「凌晨兩點起身落田,之後就返學,嗰時會俾同學笑」。 12歲時,父親因中風下半身癱瘓,他被迫輟學養家。
做過酒樓點心師傅,又做過菜市場苦力,吳玉新說當時沒有人生方向,只覺得「呢個社會冇人會幫你,冇人畀機會你」。後來在車房工作,認識了一班損友,「一星期去 Disco玩三、四晚,去食丸仔,有咩最新嘅(毒品)我一定試」,且晚晚跟損友飆車,只是越飆,心靈越空虛。
上得山多終遇虎, 18歲時他與朋友在吐露港公路飆車,最後炒車收場。「嗰時開到(時速) 220公里,掟彎時炒車,架車變成三文治,司機碎咗頭骨要縫 27針,我坐乘客位,頸椎骨碎咗,醫生話我有機會癱,甚至救唔番。」
為逞一時之快而險死,吳玉新痛定思痛,開始思考人生要怎麼過。休養一年半後,他到深水埗松記學做糖水,一次機緣巧合,他參加了教會團契,「喺出面做嘢你會覺得啲人自私自利,但團契啲人好唔同,佢哋好親切,真心關心你」。
沙士期間威院送糖水
吳玉新 10年前在大埔開設甜品店, 04年於上水開分店,既送糖水給露宿者,沙士時又送糖水給威爾斯親王醫院醫護人員,更聘請傷健人士及長期病患者打工,希望可以用糖水回饋社會。
但吳指近年舖租急升,上水店面積 1,000呎,租金 5萬元,「舊年簽約,升咗一倍!隔籬仲貴,同一個面積,今年租金去到 8萬甚至 10萬,一條街有五間舖捱唔住執咗!」他相信明年傾續約時會大幅加租,「上年年初,舖位叫價 1,280萬,家已去到 2,500萬,點會唔加租?」講愛心在自由市場經濟行不通,他無奈地說,現在生意「打個和」再加租甜品店便撐不下去了。 |